Saturday, August 21, 2004

ஓர் ஓவரில் ஆறு நான்குகள்

நேற்று இரண்டு கிரிக்கெட் மேட்சுகள் நடந்து கொண்டிருந்தன. ஸ்டார் ஸ்போர்ட்ஸில் இங்கிலாந்துக்கும் மேற்கிந்தியத் தீவுகள் அணிக்கும் இடையிலான நான்காவது டெஸ்ட் போட்டி. முதல் மூன்றிலும் இங்கிலாந்து வெற்றி பெற்று விட்டது. மற்றொன்று டென் ஸ்போர்ட்ஸில் இலங்கைக்கும் தென்னாப்பிரிக்க அணிக்கும் இடையிலான முதலாவது ஒருநாள் போட்டி.

ரிமோட்டை மாற்றி மாற்றி இங்கும் அங்கும் போய்க்கொண்டிருந்தேன். டெஸ்ட் போட்டிதான் மிகவும் விறுவிறுப்பாக நடந்து கொண்டிருந்தது. இங்கிலாந்தின் பந்து வீச்சை எதிர்கொள்ள முடியாமல் மேற்கிந்தியத் தீவுகள் அணியின் மட்டையாளர்கள் தடுமாறிக் கொண்டிருந்தனர். பிரையன் லாரா மட்டும் பந்துகளை விளாசிக் கொண்டிருந்தார். அவரும் கூட ஹார்மிசனின் எழும்பி வரும் பந்துகளைச் சந்திக்க முடியாமல் தடுமாறிக் கொண்டிருந்தார். கடைசியாக 79 ஓட்டங்களுக்குப் பிறகு ஹார்மிசன் ஓவர் ஒன்றின் கடைசிப் பந்தில் எப்படியாவது ஒரு ரன்னைப் பெற்று அடுத்த மூலைக்குச் சென்று விட எண்ணினார்; ஆனால் கால் திசையில் எழும்பி வந்த அந்தப் பந்து விளிம்பில் பட்டு ஃபைன்லெக்கில் கேட்ச் ஆனது. மேற்கிந்தியத் தீவுகள் அணியால் ஃபாலோ-ஆனைத் தவிர்க்க முடியவில்லை.

தொடர்ந்து ஆடிய இரண்டாவது இன்னிங்சில் கிரிஸ் கெயில் மாத்தியூ ஹோகார்டின் ஓர் ஓவரில் ஆறு பந்துகளையும் வரிசையாக எல்லைக்கோட்டுக்கு அடித்தார். இதற்கு முன் சிலமுறை ஓர் ஓவரில் 24 ஓட்டங்களுக்கு மேல் பெற்றிருக்கின்றனர். ஆனால் யாரும் ஆறு பந்துகளையும் பவுண்டரிகளாக அடித்ததில்லை. கபில்தேவ் எட்டி ஹெமிங்சின் ஓர் ஓவரில் நான்கு பந்துகளையும் ஆறுகளாக அடித்துத் தள்ளி இந்தியா ஃபாலோ-ஆனைத் தவிர்க்க உதவியுள்ளார். சந்தீப் பாடில் பாப் வில்லிஸின் ஓர் ஓவரில் ஏழு பந்துகளில் (ஒரு நோ-பால்) ஆறை நான்குகளாக அடித்துத் தள்ளியுள்ளார். ஓர் ஆறு-பந்துகள் அடங்கிய ஓவரில் மிக அதிக ரன்களைப் பெற்றுள்ளது பிரையன் லாராதான். தென்னாப்பிரிக்காவின் இடதுகை சுழற்பந்து வீச்சாளர் பீட்டர்சனின் ஓர் ஓவரில் 4x4, 2x6 என்று அடித்து 28 ஓட்டங்களைப் பெற்றிருந்தார்.

ஹோகார்டின் ஓவருக்கு வருவோம்.

முதல் பந்து மிடில் ஸ்டம்பில் விழுந்தது. அதனை கெயில் மிட்விக்கெட் திசையில் அடித்து விளையாடினார். நான்கு ரன்கள். கால்திசையில் மூன்று பந்து தடுப்பாளர்கள்தான். அதனால் சுலபமாக இடைவெளி கிடைத்தது.

இரண்டாவது பந்து ஆஃப் ஸ்டம்பில் அளவு அதிகமாக விழுந்தது. இடது கை மட்டையாளர்களுக்கே உரிய முறையில் முன் காலில் வந்து அந்தப் பந்தை அதிவேகமாக செலுத்தி எக்ஸ்டிரா கவர் திசையில் அடித்தார். மூன்று பந்து தடுப்பாளர்களைத் தாண்டி பந்து எல்லைக்கோட்டுக்குப் பறந்தது.

மூன்றாவது பந்து ஸ்டம்பில் விழுந்தது. அதனை பின் காலில் சென்று நேராக பந்துவீச்சாளரை நோக்கி அடிக்க, பந்து லாங்-ஆன் திசையில் நான்கு ரன்கள்.

நான்காவது பந்து ஆஃப் ஸ்டம்பில் விழுந்தது. அதனையும் பின் காலில் சென்று கவர் திசையில் அடித்தார். நான்கு ரன்கள்.

ஐந்தாவது பந்து அளவு குறைவாக விழுந்தது. அப்படித்தான் அந்தப் பந்து வரும் என்று எதிர்பார்த்து பின் காலில் சென்று பந்தை 'புல்' செய்தார். லாங்-லெக் திசையில் நான்கு ரன்கள்.

இந்த நேரத்தில் ஹோகார்ட் ஆறாவது பந்தை வைடாகப் போட்டிருக்கலாம். ஆனால் அளவு குறைந்து ஆஃப் ஸ்டம்பிற்கு சற்று வெளியே வீசினார். அந்தப் பந்தை கெயில் கவர் - மிட்-ஆஃப் இடையே அடித்து இன்னுமொரு நான்கைப் பெற்றார்!

டெஸ்ட் கிரிக்கெட்டில் இது முதல் முறை.

ஆனாலும் இன்று இங்கிலாந்து இந்த டெஸ்டையும் ஜெயித்து விடும்.

2 comments:

  1. i cant read tamil, i can understand tamil though. i like to watch tamil movies, ayutha ezhuthu rocks!!!

    ReplyDelete
  2. I have the video of this sensational over. If anyone needs it, mail me at balaji_cheenu at yahoo.com.

    - bb.

    ReplyDelete